غتسمحو لينا أسيادنا نكتبو هاد المقال بالعربية الدارجة، وخا محرك البحث كوكل ما غيقشع فيه والو، حيث عنا الوزرا تبارك الله عليهم ما كيفهموش العربية، وكاين اللي كتمرضه كاع، وكتتطلع ليه السخانة، ويتفتف، ويعرق وينشف وما يصيب ما يقول، عليها قلنا نهدرو بالهدرة ديال ولاد البلاد مع للا حكيمة حيطي وسيدي رشيد بلمختار، عاااالله يفهمو علينا.
كلشي هدر ونبه للفالطة الاولى اللي داروها الوزير والوزيرة، وهي “إهانة اللغة الرسمية دستوريا” للبلاد، عليها غنّقزو للفالطات اللي تابعاها. نقولو ثانيا: واقيلا هادو الناس، بحال كاع خوتنا الفرانكوفونيين، ما فاهمينش معنى كلمة “العربية” عليها كتجيهم تقيلة، حيث ملي يقولهم شي واحد هدرو معانا بالعربية كيقولو “سمح ليا ما كنعرفش نهدر بالعربية”، يحسابليهم كنطلب منهم يكونو حافظين “مختار الصحاح” والا “لسان العرب”، أو بغيتو يعاود ليا بلغة “الأصمعي”.. وااااللا الوزيرة، واااسي الوزير، راني دابا داوي معاكم ب”عربية أهل المغرب”، وما عرفتيش تهدر بالفصحى هدر بالدارجة البسيطة اللي يقدر يفهمها المغاربة كاملين، ويقدرو خوتنا العرب يقشعو فيها شي حاجة.. أما تنقز للفرنساوية نيشان راها ما جاتش، وطاااايحة بزاف؟ واش بنّا ليكم نْصارى؟؟
نجيو لتلاتة: علاش كتفترضو إن كاع المغاربة مجهدين بالفرنساوية؟ على زين التعليم اللي كتقروهم في المدارس اللي انتا مسؤول عليها اسي بلمختار؟ واش ما باغينش تفهمو إن معظم المغاربة اللي قراو في التعليم العمومي آخر تلاتين عام بزز كيفكو الخط بالفرنساوية، وياااالله كيسلكو راسهم بميت كشيفة.
رابعا: علاش كتهربو من العربية للفرنساوية نيشااان بلا ما تجربو تهدرو بالدارجة؟ واش حيث اللي دوا بالفرنساوية مجهد؟ قاري؟ كلاس؟ والا غي البخ والسلام؟؟ رانا إذا جينا للمعقول، فرنساويتكم مع احترامنا للجميع ما تبانش قدام العربية. العربية كيهدر بيها فوق 420 مليون بنادم والفرنساوية يالله 200 مليون. وزيد انها لغة القرآن والإبداع والحضارة هادي اربعطاشر قرن.
خمسة: ياك اللا حكيمة قلتي العربية كتمرضك وسي بلمختار ما كيحملش يهدر بيها، هادشي معا من؟ مع صحفيين مغاربة سولوكم بالعربية.. راه هاد اللي اعطا الله والسوق، الصحافة المجهدة في البلاد كتهدر بالعربية، والصحفيين اللي عندهم استعداد “يضيعو معاكم الوقت” كيهدرو بالعربية، والناس اللي حفات ليهم تا ولاو باغين يعرفو منكم آش طاري في المغرب كيقراو ويفهمو العربية، وهادو كاااااملين، سمحو لينا ما حاجتهمش بالفرنساوية ديالكم.
نقولو ستة: غي فضول منا، بغينا غي نعرفو فين قريتو ملي ما كتعرفو عربية ما كتعرفو دارجة؟؟ نقولو قريتو الجامعة برة، لكن الابتدائي الإعدادي الثانوي؟؟ طبعا ما كانش على ايامكم حضانة، بليتونا بيها تا وليتو مسؤولين.. ولا بدّ قريتو العربية ياك؟ والدراري اللي قراو معاكم واش مغاربة؟ هيا كنتو كتقولو شي كليمات بالدارجة؟؟ أو، معقولة ما بقيتو عاقلين على تا كلمة؟؟
ونجيكم من لاخر.. راه حشومة ولد بلاد يسولكم على شي حاجة بالدارجة والا العربية، وتجاوبوه بالفرنساوية، والله تا جات طايحة، الفرنساوية خلوها لديوركم، مع راجلك اللا حكيمة، مع المدام مسيو بلمختار، مع الوليدات، ملي تخرجو تخدمو مع المغاربة وليهم، وتشدو مانضة من ديك البركة اللي كيخلصو لدار الضريبة، خاصكم تدويو بحالهم، هدرة يفهموها، وخا ما كتقولو واااالو يتفهم والا يفيد.
كلمة أخيرة لسي عبد الاله بنكيران، ملي تشد السيفيات ديال المرشحين للوزارة من الأحزاب، طل واش كاتبينها بالعربية أو لا الفرنساوية، ودير ليهم الشفاوي باش تتأكد إنهم كيعرفو العربية والدارجة، باش ما يحشموش بيك، وما يطيحوش السمعة ديال البلاد، راه اللي ما كيحترمش اللغة دياله، والناس اللي كيهدر معاهم، ما عنا ما نديرو بقرايته والصوارخ اللي غيصيب لينا في الوزارة اللي غيشد !!!
المصدر : https://machahid24.com/?p=66619